上海世博開幕立立亂，立法會議員組成嘅團後日出發，尋日秘書處向議員簡介行程，三日兩夜行程中，議員既要穿梭海陸空，又要搏盡睇十個展館，朝早六、七點就要出發，女性議員一睇行程就話要放棄高踭鞋，男性議員都話夠晒辛苦，有腳患嘅富貴黨方剛更即刻退團，原因係自己隻痛腳未必應付到咁緊密嘅步行旅程。
呢個世博團暫時有四十二位議員參加，行程表顯示，佢哋後日早上六點四十五分就由立法會啟程，先去港澳碼頭搭船到番禺南沙港，然後坐旅遊巴去廣州火車南站轉高鐵往武漢，到咗武漢又再坐旅遊巴去武漢天河機場搭飛機去上海。工聯會議員KK黃國健笑笑口話，一日裏面搭齊海陸空交通工具，真係犀利！
佢哋先獲安排參觀中國館、香港館、主題館、日本館、沙特阿拉伯館同埋非洲聯合館，第日又有城市最佳實踐區、企業館區、歐盟館、英國館同埋美國館，睇完即刻坐機返香港。一日睇咁多展館，KK嘅感覺係「慘呀」！就算朝早有精神睇，睇到晏晝個人都吽晒啦﹗冇回鄉證嘅白鴿黨李永達就諗住開小差，同黨友肥仔明李華明一齊唔出席星期日晚一個官式晚宴，希望擠出幾粒鐘喺上海自由逛吓，成唔成事﹖唔知喇。