政府上周五刊憲交代鄧國斌去年四月一日起，月薪加至十九萬四千三百五十元，但根據《公職人員薪酬調整條例》第七條，佢自本年一月一日又要減薪至十八萬三千八百九十五元。不過，鄧國斌透露，成件事最吊詭嘅係，佢直至本年三月都仲係出緊原本嗰份糧，即係十八萬六千九百元，一輪加加減減後，政府上個月埋單計數，仲要喺出糧時補番近六萬元人工畀佢。

吓？鄧國斌嘅薪酬唔係跟隨公務員調整㗎咩？行會舊年十月一口氣通過三份職系架構檢討報告書，令三成二高級公務員追溯至舊年四月起可以加薪百分之三至五。減薪則因為立法會舊年尾通過減薪條例，全港一萬八千多名首長職級及高級公務員今年一月一日起減薪百分之五點三八。

煲呔曾刊憲一味拖

點解鄧國斌遲過大隊減薪四個月呢？歸根究柢又係煲呔曾做事慢手慢腳所致，事關按《核數條例》第4A條，審計署署長調整薪金要由特首下令刊憲交代，政府拖到上個月尾先刊憲，鄧國斌份糧咪唔上唔落條條fing囉！講番呢個又加又減嘅遊戲，源於煲呔曾舊年六月話政府高層要同市民共度時艱，但減薪未過，行會已通過公務員職系架構檢討報告建議，結果係大部分公務員都有人工加，所以一眾高級公務員份人工「先加後減」，呢個所謂「共度時艱」嘅口號，亦變咗一場政治騷。