政府將新高中學制吹到天上有地下無，話可以同國際接軌，畢業生升學唔憂冇出路喎。可惜，新制啱啱推動就問題多多，莫講話同國際接軌，就連同本港嘅副學士課程銜接都成問題。嗱，二○一二年，第一屆新高中學生同埋最後一屆中七學生同時畢業。到其時，加加埋埋共有五萬幾人要轉讀副學士課程，但係屆時副學士課程學位最多增加到三萬三千個，即係話，仲有兩萬幾個畢業生冇着落。如果呢啲畢業生一次過投入勞動市場，失業率唔飆升至奇。

咁仲未算慘，最慘嘅係報讀副學士人數唔係逐漸增加嘅，而係暴跌暴升。因為之前一年已經冇中五學生畢業，淨係得番一屆中七學生會報讀副學士。好多副學士課程都會收唔到人，尤其係主要靠中五生來源嘅院校，直情要嗌救命。生源減少，學校收入自然縮水。嗰啲自資副學士課程就難頂咯，難怪好多人都話，明年係副學士課程「最難捱嘅一年」。

仲有噃，多出嚟嘅教師點安排呀？唔通白養一年咩，如果炒晒佢哋，第二年學生增加，又去邊度搵老師？

所以話，未來兩年，全港嘅副學士課程一定亂晒大龍，直情遭遇一場大災難。難為班高官仲滋油淡定，佢哋話喎，政府到時會增加副學士課程嘅學額，仲會向畢業生提供其他出路咁話。但係有學者踢爆，副學士課程嘅課室、圖書館、電腦室等設施都有限，加上一時好難請到好嘅導師，所以二○一二年根本冇可能大幅增加副學士學額。

有關注團體狂炳政府過度樂觀，唔肯正視問題，任由院校自生自滅。不過，計太一叮話齋，過度樂觀係假，明知有問題裝聾扮啞，唔想孭鑊係真。

叮佢個鎯鎯，件事搞成咁，都係因為班高官根本冇長遠規劃，一味急功近利，轉咗制先算，話之你班畢業生有冇出路啦，出咗事又頭痛醫頭，腳痛醫腳，始終止唔到咳。咁搞法，有乜法子唔倒瀉籮蟹呀。

俗語話，冇咁大個頭，就唔好戴咁大頂帽，太一叮奉勸各位高官，如果力不從心嘅話，就唔好再搞埋晒咁多不知所謂嘅改革嘞，好心你哋畀學生、家長同教師過番吓安樂日子啦。叮！