華懋集團主席龔仁心伉儷同兩個細妹龔中心、龔因心，尋日又以「四人組合」形式出現喺華懋位於黃竹坑嘅南灣海景酒店，為華懋贊助嘅「傑出青少年音樂家大獎」揭幕禮助陣，而鋼琴王子李雲迪、衞生防護中心總監曾浩輝都有嚟撐場。原來曾浩輝係李雲迪嘅粉絲，會後仲追住鋼琴王子攞簽名。
其實曾浩輝彈鋼琴已有演奏級水準，佢話自己係音樂愛好者，平時喺屋企或車上都會聽吓音樂，所以見到偶像李雲迪，個心即刻卜卜跳！
第二屆「傑出青少年音樂家大獎」總冠軍、單簧管好手賀蓁喺場內問李雲迪點樣紓緩演奏前嘅緊張情緒，李雲迪話有適當嘅壓力係好事，但演奏時嘅體力同精神消耗好大，所以，如果佢晚上有演出，下晝就會瞓兩、三粒鐘放鬆吓。
至於首屆總冠軍、鋼琴小子沈靖韜，依家就讀於拔萃男書院，佢話四年前勝出後對佢嘅生活冇乜大影響，最大好處係喺學校冇人夠膽打佢喎！
沈靖韜同賀蓁仲即時演奏名曲以饗現場嘉賓。龔仁心見到兩位後生仔咁出色，話要多啲支持青少年嘅藝術活動，為社會創造更多精神財富。