浸大校長吳清輝快將卸任，由理大副校長（科研發展）陳新滋接任，但吳校長臨走前竟然遇上大整蠱，先有神秘人放料，指佢會將一年薪酬捐畀內地做善事；近嘅再有報章質疑佢解僱員工，用人唯親。是非接二連三，擺明同吳校長過唔去，佢話唔知邊位仁兄咁大整蠱，對謠言一笑置之。
浸大是非多，但無損善長捐錢熱情。由浸大校友李如樑揸旗嘅「中國富強基金會」，尋日捐出三百五十萬元支持大學發展，校友咁熱情，吳校長同浸大校董會主席王英偉親自出馬收支票。
講起捐錢，吳校長早前畀人傳佢將捐出五百萬元，單嘢原來係流料，佢苦笑話唔知邊位造謠，仲話對方認真睇得起佢喎。其實，吳校長平日都有做善事㗎，佢同太太喺四、五年前就捐出十幾萬元成立一項獎學金，鼓勵有殘疾嘅學生努力學習。
吳校長呢排好「惹火」，會後畀傳媒追問人事風波單嘢，佢淡定咁回應話，不論解僱員工或任命副校長，都係按既定程序做，問心無愧。言下之意，似乎對近日嘅指控顯得相當無奈。