本文重點
香港早前掀起「正字熱」，都係想大家讀啱啲中文字嘅音。稅務局局長朱鑫源個「鑫」字都算冷門，普通人唔識讀不足為奇，稅務局尋日召開記者會，梗係把握機會問清楚朱局長個名應該點讀啦！朱局長就笑笑口咁話個「鑫」字有好多讀法，好多人都會讀錯，而佢個名嘅「鑫」字，應該讀成樹蔭個蔭。
唔少人跟住屋企讀
朱局長講就講得振振有詞，之但係語言學學者就唔係咁睇嘞。尋日請教過城大中文翻譯及語言學系助理教授藺蓀，佢話根據香港語言學學會粵語拼音字表同《商務新辭典》，「鑫」字只能讀成「陰」，無論點都冇理由讀成「蔭」，仲話：「股票都有一隻叫『新疆新鑫（音：陰）』啦！」
咁朱局長咪讀錯自己個名幾十年囉，似乎過分咗啲喎！藺教授話好多人出世改名時，屋企人讀乜佢就讀乜，如果連自己個名都唔緊張時，讀錯自己個名唔係冇可能嘅事喎。朱局長連自己個名都讀錯，唔怪得之成日計錯數啦！