作為政改方案推銷員嘅政制及內地事務局局長「林公公」林瑞麟，成日同民主派駁火，繼喺「城市論壇」上為「公公」外號反寸公文袋黨魁余若薇後，尋日喺立法會政改小組委員會上又出招。
事緣會上有議員批評政改方案建議八百人選委會四大界別各增一百個委員，卻未列明具體產生辦法，情況好似奸商推銷服務套票，收晒錢後隨時貨不對辦。畀議員質疑政府係奸商，林公公亦不甘示弱，仲駁斥話：「我唔接受將特區政府比喻為奸商！」佢重申有關改動應留待本地立法階段研究。
林公公鬥嘴反應咁快，似乎有啲一反常態喎，事關佢係人肉錄音機o架嘛！唔通真係熟能生巧？
