佢早前失驚無神宣布參選九龍西，大家都百思不得其解，有一套陰謀論更猜測佢受人背後指使，狙擊社民連黃毓民。不過，有地區人士指出，至今未收到要暗撐白姐姐嘅動員指令，反而，白姐姐為佢嘅好拍檔、立法會旅遊界議員阿Paul謝偉俊鋪路選九西嘅傳聞，則甚囂塵上，為二○一二年立法會選舉部署提早拉開戰幔。

稱兩人政治立場唔同

所以，白姐姐競選，洗樓、出席論壇同街頭嗌咪，阿Paul幾乎形影不離，仲親密過舊年「青島張茆」風波後復合嗰陣。究竟係阿Paul幫白姐姐助選，定係白姐姐搶閘幫阿Paul拉票造勢呢？真係好難分得清楚。

就傳聞打電話畀白姐姐，佢話同阿Paul政治立場唔同，兩人甚少談論呢方面嘅事，叫記者直接問阿Paul。阿Paul則話冇諗過轉戰直選，白姐姐參選亦同佢冇關，指傳聞純屬推測喎！

無論點都好，白姐姐仲要同當區嘅候選人佘繼泉、郭兆明、蔣世昌、黃永志、張錦雄、黃毓民以及林依麗等拗手瓜，一切都要佢拗贏咗先知係點。