建制派自己唔爭氣

一向計多數口精嘅金勞詹話，兩個月前，佢苦苦思索點樣可以令政改方案通過，終於畀佢諗到一條獨步妙方，雖然有啲天馬行空，不過亦唔係冇可能。按金勞詹嘅計劃，主要分兩部曲，首先，由建制派合力否決五區補選撥款，令五名民主派議員無法返回議會，令立法會只剩低五十五名議員；然後，再由政府將「全體議員」定義為五十五人，㩒一㩒計數機，通過政改方案所需嘅三分之二議員，就由四十人一下子變為三十七人，呢個數唔多唔少，啱啱就係建制派議員嘅總人數。講到呢度，大家應該估到金勞詹條橋啦。

嘩！佢簡直當自己攞住個水晶球咁，預示晒一切結果，之後仲計埋立法會主席要辭職，於是咪自己走去游說佢認為最有機會應承接手做立法會主席嘅KK囉。點知，KK都未認真思考，建制派已經自己唔爭氣，通過補選撥款，而政府亦堅持將「全體議員」定義為六十人，即係話，金勞詹嘅水晶球失靈，而佢嘅大計亦成泡影，可能留番下屆特首推出二○一七年政改方案先至啱用。

金勞詹條橋係咪天馬行空，要大家自行判斷，不過講乜都假，一切已經係明日黃花，反而依家最失望嗰個可能係KK，事關本來大家以為KK終於捱出頭來，真係有機會做立法會主席，點知全部只不過係一場誤會，係金勞詹嘅個人行動、空中樓閣。唔知KK知道之後，會唔會打電話畀金勞詹找佢晦氣呢？