呢，話口未完，康文署轄下公眾泳池又出事嘞。有位十三歲中二女生前日喺牛池灣斧山道游泳池遇溺，送院後證實不治。出事地點唔係深水區，而係水深只有零點六米嘅嬉水池。

咁淺水都出事，令人難以置信。唔通事發嗰陣現場周圍冇救生員？唔係噃，有目擊事件經過嘅泳客話，當時見個女仔俯伏池面，以為佢玩「閉氣潛水」，但過咗幾分鐘都冇動靜，發現唔對路向池邊嘅救生員揮手同揮動浮板，但救生員並無反應。泳客惟有向距離遠啲嘅救生員求救，可惜女童被救起之後已經返魂無術。有泳客質疑悲劇同救生員「睇漏眼」有關。

叮！泳季啱啱開鑼就有人遇溺死亡，而且仲懷疑涉及救生員未有及時發現，以致延誤救治，事件的確令人關注。目前女童死因有待調查確定，不過按普通常識判斷，遇溺冇人察覺離唔開兩種可能，一係救生員失晒神，注意力唔知去咗邊，結果睇漏眼；一係現場冇足夠拯溺人手，救生員顧到左顧唔到右，望得前嚟望唔到後，根本睇唔切。

有立法會議員話，事件反映公眾泳池救生員不足，促請署方檢討人手安排。佢曾經多次協助救生員工會要求署方增加人手，但康文署都當耳邊風。而港九拯溺員工會負責人就直斥康文署削減救生員人數，係問題根源。

原來公眾泳池救生員唔夠人手已經唔係最近嘅事，自從○四年康文署大幅削減救生員以來，問題一直存在，依家人手明顯低於標準。嗱，一個標準池按國際標準至少應有四至六名救生員，但香港得三丁人，唔計守住救護站嗰位，實際上只得兩個，一個負責周圍巡，一人坐救生台。

咁就弊傢伙咯，暑假人流高峰期，泳池人多到十足煮緊餃子隻大鑊咁，一個個擠埋一堆。咁嘅環境，救生員咪話一眼關七呀，正一係一眼關九都搞唔掂，唔睇漏眼至奇啦。

仲有呀，康文署每年都會請季節性救生員，由於人手不足，資深救生員難以兼顧培訓，新丁未有足夠經驗，冇事嗰陣就好似紙板人咁戙喺度，有起事嚟就騰晒雞，係咁，泳客安全邊有保障呀？

咪話太一叮唔提醒康文署，冇幾耐暑假又到，去戲水暢泳嘅市民尤其係小朋友隨時逼爆公眾泳池，假如唔正視救生員人手問題，唔採取措施堵塞拯溺環節嘅漏洞，繼續做紙板人，悲劇遲早會重演o架。叮！