03/05/2010

播放本新聞相關短片

政情:李小鵬講英文頭頭是道

本文重點
金牌運動員個個身價值千金,就算退咗役同樣受到品牌歡迎,世界體操冠軍李小鵬同○八年奧運體操個人全能金牌得主楊威,尋日就獲瑞士品牌IWC送贈價值四萬蚊嘅名錶。

依家喺美國讀緊英文嘅小鵬,今次同楊威嚟香港,主要係為咗出席慈善表演。小鵬已經去咗美國半年,尋日同品牌高層用英語交談講得頭頭是道,但佢就好謙咁話聽同講係可以,但寫同睇就要花多少少時間,仲話一完成表演就要即刻返美國考試。佢擔心今次缺咗幾堂課難追進度,返去要搵老師補堂先得。

楊威呻湊B辛苦

小鵬同女朋友李安琦一齊喺美國讀書,平時都係用英文溝通,就算談情都用英文,難怪小鵬嘅英文進步神速啦。小鵬又話如果有機會都想好似師兄李寧咁做生意,但就要先讀經濟同管理學充實吓自己先。

楊威已經做咗爸爸,有個五個月大嘅囝囝。佢話做爸爸好辛苦,既要滿足BB嘅要求,又要了解佢有乜嘢需要。講係咁講,楊威講開平時要落手落腳幫囝囝換片時笑到見牙唔見眼,就知佢幾享受湊仔樂啦!