仲有兩個禮拜就到立法會補選投票日，建制派多數選擇離開香港費事眼冤，有政黨搞澳門遊，有社團就搞高鐵團，但有人確係撞正當日出外公幹。從事製衣生意嘅青年事務委員會主席Bunny陳振彬身兼觀塘區議會主席，佢話十五號可能身在泰國，去巡視當地嘅製衣廠房，所以十六號未必可以去投票。
Bunny泰國間廠房約有一千個員工，規模已較高峰期三千個員工大縮水，主要因為近年泰國局勢動盪不穩，製衣定單大幅減少，廠房規模自然要縮水，所以佢語重心長咁話社會要謀發展，一定要講和諧、講穩定，亂晒龍只會嚇走投資者。佢又講開十八區議會正、副主席將會喺下月四號出發到上海參觀世博，雖然開幕發生混亂，但佢相信經過一個月時間磨合後會運作暢順。