香港專業聯盟尋日同一支甲組球隊嚟咗場友誼波，立法會體育界代表霍震霆都有嚟，完場後，佢仲落草地同班正在訓練嘅小朋友球員搓番幾腳。霍公子同已故父親、全國政協副主席霍英東都愛足球，佢話有次爸爸出席球賽球癮發作，叫佢負責頒獎，改為自己落場；霍老仲同佢講，事業無論幾成功，都唔及球王比利射入關鍵一球帶畀全國歡樂。
霍公子又話最近立法會同僚張文光送咗張剪報畀佢，剪報上報道張文同霍老鬥波。張文話有次南華足球隊同由立法會及臨時巿政局議員組成嘅代表隊踢咗場友誼波，當時霍老以南華隊中鋒身份迎戰，係張文嘅對手。
張文記得當時議員隊嘅隊長吩咐大家如果負責mark霍老就要因住，千祈唔好整親老人家，張文依足指引，自言打咗一場「假波」，點知一張霍老啱啱超前張文嘅相翌日大大張登咗喺一份報紙上。張文到尋日仲呻笨，話唔知張相會唔會放喺霍家籌備中嘅霍英東博物館。