五十五歲嘅入境處處長白韞六，按照舊制將喺今年底退休，就算政府基於接任部署安排，延任佢坐多一年半載，估計佢最遲出年亦要全身而退。呢個「一哥」嘅接班人選，以副處長陳國基呼聲最高，而任職入境處二十八年、由助理入境事務主任一步步爬至首長級官階嘅陳詠梅，本來被傳係接替陳國基成為副處長嘅大熱，有望成為本港首位入境處「二姐」，點知佢突然遞大信封，要求提早四年退休。
陳詠梅係回歸後首位出任入境處助理處長嘅女高官，其搏到盡嘅工作表現深受前上司賞識，可算入境處明日之星，所以佢嘅呈辭消息相當突然，震驚內部。入境處舊年出現大地震，被指處理蘇錦樑卡片事件同泰國包機風波表現欠佳嘅副處長趙偉佳突然放長假，燉冬菇之說甚囂塵上，依家又冇埋一位助理處長，令處內高層嘅接班部署進一步被打亂，真係屋漏兼逢連夜雨。
據內部揣測，陳詠梅遞信求去，可能同處內一幕「二姐」寶座之爭有關。副處長一職涉及隔代入境處「一哥」嘅戰略部署，政府內部到呢一刻好大機會已經敲定人選，可能有人赫然發現新娘不是我，於是毅然放棄高薪厚祿，遞信求去咁話。如果呢個猜測係真嘅話，呢套入境處《宮心計》劇情就精彩囉。