老實講，普通話（煲冬瓜）喺香港愈嚟愈普遍，尤其係對商界人士嚟講，識聽識講更加係基本要求。之不過，香港賽馬會主席阿John陳祖澤，竟然係受到一個煲冬瓜了得嘅外籍人士所刺激，先至的起心肝學好煲冬瓜。
阿John上禮拜四喺港大專業進修學院，以「學到老的人生」為題，同逾一百八十名與會者分享佢「做到老，學到老」嘅經驗。話說佢曾經去一間小學擔任畢業禮主禮嘉賓，當時所有講者嘅煲冬瓜都好了得，包括校長、畢業生同家長代表，而嗰位家長代表仲係美國人，講嘅煲冬瓜既流利又字正腔圓。
喺咁嘅情況下，阿John惟有幫自己搵下台階，自嘲咁講：「為咗令大家明白我講啲乜，所以只可以用廣東話致辭。」其實佢咁講都係好多不諳煲冬瓜嘅名人常用嘅招數。但經此一役，佢就畀足心機學煲冬瓜，仲話依家嘅煲冬瓜一啲都唔普通添！
阿John縱橫政商界逾四十年，佢坦言經常要學習新嘢。以佢曾出任九巴董事長為例，咪以為佢做過高官，又一世人坐巴士，就識得管理巴士，查實單係維修巴士、司機編更等已經大有學問。