條片見到兩個女人喺鵝頸橋打小人，其中一個拎住隻高踭鞋係咁打，個小人身上就寫住「惡晒高層」，負責打小人個女人仲一邊口噏噏鬧管理層推行新調更制剝削員工，成日廢噏搵藉口，下一次又唔知出乜嘢新招，所以要先下手為強；另一個就一唱一和咁話，打小人係冇用嘅，上次八百幾人圍公司就怕咗佢哋，公司最驚佢哋團結，所以呼籲員工一定要參加工會呢個月二十一號嘅周年會員大會咁話。

工會總幹事曾國豐話，係有條咁嘅片擺咗上YouTube呼籲員工參加AGM，但就話未定議程傾乜，要睇埋下禮拜二同管理層開會傾成點先。國泰發言人就話，條片入面冇提及國泰字眼，又唔可以證明片入面嗰兩個女人係咪國泰員工，所以冇得回應喎。