03/05/2010

播放本新聞相關短片

政情:鬍鬚曾計錯數拉局長落水

本文重點
財爺鬍鬚曾慣用「狼來了」嘅伎倆,宣讀完份劣評如潮嘅預算案後,即畀班立法會議員鬧佢係「孤寒財主」同「守財奴」,卒之係點?

政府喺上個禮拜五公布截至三月底嘅上個財政年度全年臨時財政狀況,盈餘由二月估計嘅一百三十八億元,暴增近九成至二百五十九億,短短個幾月竟然相差一百二十一億元,誤差之大創咗回歸以嚟最大。就住呢個例證,各大政黨都鬧爆鬍鬚曾離晒大譜,聲言要佢中期放水幫貧困戶,有經濟學者更批評佢嘅預測「九流過九流」。

但係鬍鬚曾仍然死不認錯。佢尋日喺個人網誌度話要爆制訂預算案誕生嘅過程同鮮為人知嘅傳統,話佢喺聆聽各界意見,考慮政府財政狀況同平衡多方面因素後,會做出一啲初步構想,然後會聯同一個預算案策略小組,研究各項構想嘅可行性,每隔一至兩個禮拜就會開一次會。

賴人哋報錯料

出席會議嘅,除咗寫手外,仲包括財經事務及庫務局局長「傻強」陳家強同局內嘅同事,而有時亦會邀請相關局長或同事出席,共同研究佢哋所屬政策範疇嘅撥款需要,同深入研究各界建議嘅可行性同對公共財政嘅影響等,所以預算案嘅初稿大約喺二月初面世,但好多具體嘅建議同數字都係等到最後一刻去敲定,由初稿到定稿,刪改不下十次之多。

咁佢今次爆料為乜?擺明係想話畀大家聽佢好勤力兼且有聽民意o架,但同時暴露佢唔單止厚面皮唔肯認錯,仲拉埋傻強同其他局長落水,幫佢兜住唔係自己計錯數,暗示係班局長報錯料先搞成咁。

嘩!咁都得?鬍鬚曾管晒政府成盤數,咁都掌握唔到政府嘅財政狀況,根本就係失職兼涉嫌呃立法會,但佢擺出一副唔關佢事咁款,仲話係問責官員喎,應該話佢係卸責官員就真!