小白觀點:小霸王影響市容
內地實行一孩政策，搞到好多細路變晒金叵羅，乜都有人照顧，乜都唔識自己做。有調查發現，新一代好多都唔識綁鞋帶，相信日後會有一行「代客綁鞋帶」應運而生。
話時話，何止內地吖，香港地都大把金叵羅，喺酒樓港鐵商場，不知見幾多呀，唔識綁鞋帶PK係佢哋嘅事，但呢啲口靚仔豆釘咁大，已經好似小霸王咁，成日喺公眾場所大叫大鬧，咁就未免有啲影響市容咯。
有次喺商場見到有一個「05後」，唔知因乜事扭計，大字形攤喺地要生要死，跟手一巴打落老竇度，再一腳伸埋去印傭度。當老爸想教訓吓呢個衰仔時，難得阿媽又話：「你試吓鬧佢吖，信唔信我哋一齊跳落去！」金叵羅唔止唔驚，望住老竇仲一臉囂張，見到啲咁嘅衰仔，難怪外傭時不時頂唔順，要特別調製啲正嘢畀少主飲啦。
Blog:http://sunsiupak.blogspot.com
阿豪觀點:識挖鼻亂彈黃金
有內地調查發現，原來依家好多細路竟然唔識綁鞋帶，難怪小白兄驚呼遲啲可能會時興「代客綁鞋帶」呢一行。
計豪伯話，咁講法真係唔可以話係天方夜譚。其實莫講話內地細路，連香港有啲小朋友都唔識啦，唔係嚇你，豪伯真係曾經見過有個十幾歲口靚仔，行行吓街突然停喺度，跟住就見佢阿媽烏低身幫佢綁鞋帶……明明見佢之前攞住部PSP起勢咁打，照計智力應該正常㗎喎……真係唔明，明知個仔唔識綁鞋帶，好心叫佢着有魔術貼嘅鞋啦！
諗諗吓，綁鞋帶都算係一個幾複雜嘅動作，依家啲細路，手指可以應付嘅最複雜動作，可能只係喺電腦鍵盤上打字，同埋打手機SMS而已！
咦，又唔係喎，其實挖鼻都係一個要求手指好靈敏嘅高難度動作，點解佢哋仍然可以將「黃金」周圍彈呢？
Blog:http://lukchiho.blogspot.com
網友觀點
單眼佬：做乜啲父母會將自己嘅仔女搞到好似殘疾人士咁呀？
富二代：自己唔識冇緊要，識得點人去做就得啦！
小賓：國家實行一孩政策，有責任教導全國父母如何正確愛錫子女。
犀利勤：內地人需要代客除褲放屁。