政府成日吹水唔抹嘴，話要令香港重見藍天白雲，但都係得個噏字。嗱，新成績單出爐嘞，環保署公布粵港珠三角空氣質素，雖然四種污染物中有三種平均值比○六年下跌，但係毒臭氧就不跌反升一成七，淨係計本港，更加升咗一成九咁多，仲惡劣過珠三角。環保署死死氣承認，臭氧係導致本港路邊空氣污染持續嚴重嘅元兇之一，就算其餘三種污染物濃度下降，路邊空氣污染指數仍會高企。即係話，政府嘅減排大計又係肥佬。
話時話，毒臭氧濃度上升唔係小事o架。環保署承認，高濃度臭氧有刺激性，會增加感染呼吸系統疾病嘅機會。有醫學界人士仲指出，人吸入高濃度臭氧，可能會神經中毒，造成視力下降，記憶力衰退。
點解臭氧愈嚟愈多？環保署話喎，舊年陽光強度不斷增加，雨水較少，先至令臭氧濃度高企。照咁講，香港空氣質素惡劣，係老天爺作怪，唔係政府減排不力。咁都得！
可惜，環保署可以賴天，但就無辦法隻手遮天。科技大學大氣研究所主任劉啟漢踢爆，臭氧係由氧氣、氮氧化物及揮發性有機化合物喺陽光作用下發生化學反應形成嘅，涉及多種因素，唔可以淨係話陽光造成。
咁簡單嘅道理，環保署唔會冇人識啩，署長王倩儀就話係外行啫，但該署仲有好多專家o架。其實唔識係假，擘大眼講大話，愚弄市民就真。
係人都知，本港空氣嘅主要污染源係來自發電廠同埋珠三角吹過嚟嘅工業廢氣，當局如果有心治理，對症下藥咪得囉。但係當局唔敢從源頭治理，反而度出停車熄匙呢啲屎橋，有乜法子唔搞到一鑊泡吖。
正如環保組織話齋，香港車多、樓宇密集，政府淨係靠停車熄匙，係唔可以改善路邊空氣質素嘅。實際上，環保人士近年曾提出好多改善空氣質素嘅建議，例如盡快淘汰舊式柴油車、更新巴士車隊等等，但係環保署根本當人哋冇到，左耳入右耳出，叮！
香港空氣質素惡劣，令外資望而生畏，近年好多跨國公司因為頂唔順香港嘅空氣質素，紛紛將總部搬出香港。其實，要走嘅唔單止係跨國公司，連一直喺本港研究改善空氣質素嘅港大講座教授賀達理亦頂唔順，退休後即刻返英國定居，佢講到明，離開香港係為咗可以呼吸新鮮空氣，佢仲斷言，香港空氣質素喺未來五年都冇可能改善。請問王倩儀，學者用腳投票，作為環保署署長，你唔面紅嘅咩？