小白觀點:喪入密碼唔躁就假
繼女生上得網多自我形象愈低之後，再有外國研究發現，原來電腦壞機呀、開機時間慢呀，再加上各種古靈精怪、匪夷所思嘅技術故障，係會令數碼年代人患上「電腦抑鬱症候群」，係真唔係呀？唔係講笑，我發覺自己都可能係病人之一，而且仲係病得幾嚴重嗰種，喺度不妨同大家分享一下病情。
先唔講部機有冇壞，單單係上網各種密碼，已經足以令人發病，八個位都話未夠安全，仲要英文數字夾雜，三個月改一次，有時仲要彈多一個驗證碼出嚟，要閣下跟住輸入一次。老實講，嗰一大堆字母加數字，或三尖八角堆埋一齊，到底係Q、係O定係0？正常人根本分唔清，至少打多廿幾次至入得啱。
好嘞，花咗成個鐘至行到呢一步，以為順利過關？噢，Sorry，呢個時候，網頁就會彈個Server Error出嚟，何止電腦抑鬱呀，當堂電腦狂躁啦！
Blog:http://sunsiupak.blogspot.com
阿豪觀點:易忟冇耐性唔出奇
有外國研究發現，電腦壞機呀、開機時間慢等技術故障，會令人患上「電腦抑鬱症候群」嘅症狀……講到咁複雜，同講話令人好「」，到底有咩分別呢？
講到「」，咁啱喺fail blog網站見到條片，有條友喺度玩緊個touch screen，點知玩玩吓成個畫面變咗藍色error畫面，當堂變臉起勢揼個「芒」……
講番「電腦抑鬱症候群」，其實只係反映現代人真係冇乜耐性，好似豪伯咁樣，莫講話電腦死吓死吓會令我好憎，就算等車超過三分鐘，甚至乎喺鬧市行街，點知前面成排人平排龜速行走，都會慶幸好彩香港有嚴格嘅槍械管制，否則我一定會……
回心一諗，其實上網要獲得嘅資訊，有幾多真係好重要呀？快五分鐘去到目的地，唔通工作效率即刻提高一倍咩？潮流興講「慢活」，睇嚟豪伯都要試吓……
Blog:http://lukchiho.blogspot.com
網友觀點
棠棠：唐唐喺世博遇到電腦故障，唔知佢有冇患上呢個症喎。
抑鬱人：我經理也是，經常拍打電腦，應該入青山……
排骨仔：依家乜都用電腦，就算真係會令人抑鬱都要用㗎啦。
阿甘：電腦維修公司可同精神科醫生合作提供一條龍服務吖。