喺阿王細細個時，佢爸爸已經教佢執筆練字，喺小學時仲贏埋學界書法比賽，人仔細細已經喺大會堂即席揮毫。佢記得當年因為家貧，過年曾經同爸爸父子兵落街擺檔賣揮春幫補吓，佢話好多街坊讚佢手字掂，年年都賺到唔少錢喎。

書法寫得好又點先？咁咪有計囉！眾所周知，運輸及房屋局局長Eva鄭汝樺寫書法好了得，阿王尋日話好多年前喺立法會上，Eva曾用鉛筆寫字條畀佢，當時已覺得佢手字係高官之中最好嘅。跟住佢自爆因為咁特登題咗首打油詩，喺上個禮拜嘅立法會大會送畀Eva，寸爆佢用嚟壓抑樓價嘅「九招十二式」冇立法路線圖。阿王話依家啲官好怕收議員嘅「禮物」，佢「以文會友」，Eva就冇藉口拒絕接收啦！咪可以綁死Eva，焗佢收「禮」囉！