政府尋日宣布市區重建局主席張震遠冧莊做多三年，同時委任兩個新血加入市建局董事會，一個係建築師廖宜康，佢爸爸係港英年代嘅高官廖本懷，媽媽係芭蕾舞蹈家毛妹，成名作係參加西九文化藝術區設計比賽得到亞軍，輸畀英國大師Norman Foster嘅天幕設計；另一新血係「住好啲」老闆楊志超。
發展局局長林鄭月娥講過同張震遠好合拍，尋日林鄭喺新聞稿中繼續盛讚佢高瞻遠矚，係一位不可多得嘅領導人才，直情捧到佢上天咁滯。
張震遠尋日下晝出席一個活動時就話好榮幸再獲委任，等佢有機會繼續服務舊區居民，為佢哋多做啲事。新委員楊志超係潮人，創辦「住好啲」，以「delay no more」為口號推出一系列印有呢句諧音粗口嘅產品，T恤最好賣。張震遠仲搞Gag，話「delay no more」會變埋市建局口號。粗口都用？可圈可點喎！向好嘅方向諗佢係寓意重建項目唔會一拖再拖，速戰速決！向壞嘅諗係咪第日市建局職員落區着住「delay no more」T恤，遇到示威人士就派埋畀佢哋，叫班地區人士同保育人士咪阻頭阻勢，阻住市建局嘅重建項目呢？