台灣駐港機構、光華新聞文化中心主任羅智成上周四抵港履新，前幾日佢首次喺光華蒲頭。唔講唔知，原來佢太太下個月臨盆，而佢嘅新詩集亦就嚟出版，迎接兩個「新生命」嘅喜悅溢於言表。
羅智成係台灣知名詩人，初嚟甫到，佢笑稱連呼吸都未順暢，依家仲未決定BB喺香港抑或留喺台北出生，但當務之急係搵番幾位香港詩人老友，仲話要搞個讀詩會添。當晚光華仲請咗嚟自台灣嘅亞視行政總裁胡競英演講，有幾百人捧場，羅智成即時話現場應該擺番部咖啡機，事關書香、咖啡香，正是台灣文化界令人熟悉嘅味道，轉數好快！
胡競英同永遠廿五歲嘅校長譚詠麟拍過戲，原來佢就係當年嘅女星胡冠珍，難怪畀主持人戲稱今年廿一歲，事關佢細譚校長四歲。但五十一歲嘅佢並唔介意講真實年紀，仲話：「今天永遠都是我這輩子最年輕的時刻，所以我要好好混！」