龍傳基金尋日喺內地搞咗個慈善高球賽，慈善賽以四人一隊，每隊「入場費」最少捐出兩萬蚊，由於有銀行界「梁朝偉」綽號嘅滙豐亞太區行政總裁王冬勝同保安局局長李少光擔任高球賽主禮嘉賓，於是順理成章同埋一隊。中策集團主席馬時亨同朋友組隊，金利來集團副主席曾智明太太黎瑞恩亦另組隊出賽。
李少光同王冬勝嘅球齡都超過八年，以前都創下一桿入洞佳績，李少光更試過三年內兩次一桿入洞，享有「三年抱兩」嘅美譽，所以兩人落場保持一貫水準，打得遠之餘，仲係四至五桿就搞掂。不過，李少光好謙虛唔認打波叻，仲向王冬勝笠高帽話：「王冬勝打波好過我，佢先至係師傅呀！」王冬勝就自嘲打波「無定向風」，打得唔係好穩定，皆因以前打波主要同客人傾偈喎！
今次球賽共籌得逾六十萬元善款，連同基金活動及籌募委員會副主席「媽打」李麗娟籌得嘅一百二十萬元，總數達一百八十萬元，將支持五百名家境貧困嘅中學生到上海世博參觀。