本文重點
財爺鬍鬚曾今年推出「炒冷飯」財政預算案，扶貧措施不足、遏抑樓價無力，被多個泛民政黨同獨立議員窮追猛打，破天荒提出九個修正案，就連及後嘅特首答問大會都要讓路。不過一延期就撞正已故全國政協徐展堂嘅追悼會，部分議員就打電話畀特首辦反映，「等收工」嘅煲呔曾可能為咗唔想得失議員，死死地氣改期，最後變咗下星期四先去立法會解畫，引起泛民陣營不滿，狂轟「孖曾」同部分議員罔顧立法會全體議員意願，「禮崩樂壞」，破壞立法會體制。
自把自為應道歉
立會內務委員會尋日跟進答問大會故意繞過內委會臨時改期嘅問題，內會副主席李華明引述會見司長回覆話，改期只係應議員要求，唔係煲呔曾唔肯去立法會，亦話唔係當局主動話要改期，總之就將所有嘢推畀立法會主席，話佢冇諮詢議員意見，乜嘢都唔關孖曾事。
公文袋黨魁余若薇就認為特首辦漠視立法會正常運作，又將個別議員嘅意見當做成個立法會嘅意見，根本就係自把自為，特首辦應該就佢哋嘅鹵莽行動向立法會道歉。
白鴿黨副主席劉慧卿就質疑點解立法會主席收到特首辦通知嗰陣冇再通知內會主席Miriam劉健儀同其他議員就下定論，又指出成件事根本就係「禮崩樂壞」，上至煲呔曾下至立法會主席都冇尊重立法會。
不過立法會秘書長吳文華就幫手解畫，指今次特首辦做法都合乎一貫做法，只係諮詢議員意見嘅手法可以改進。
因為時間關係，呢場「禮崩樂壞」嘅辯論短短十分鐘就暫告一段落，Miriam話會繼續跟進。不過，以泛民呢兩大女龍頭嘅噴火態度，若果孖曾唔出嚟認錯攪亂晒程序嘅話，睇怕喺下星期嘅內會度，呢個議題肯定會繼續爆。