呢嗱，又有人摑醒政府嘞！呢次輪到港產著名國際數學大師丘成桐。乜事令大師咁扯火？咪係人才培養囉。佢批評港府鼠目寸光，對博士後研究生缺乏支持，推動高科技產業得把口齋噏，本地培養嘅人才不斷離開，香港冇得益，反而便宜咗鄰近地區。

丘成桐係首位兼獲有數學界諾貝爾獎之稱嘅菲爾茲數學獎，同沃爾夫數學終身成就獎兩項殊榮嘅華人科學家，致力培養人才多年。呢次狂炳當局只睇重地產、金融發展，窒礙學術研究，浪費科技人才，可謂專家之言，擲地有聲，句句到肉。

正常嚟講，研究生完成論文之後，要幾年時間消化知識同跟進研究。點知港府短視到論文完成即閂水喉，佢哋一方面難搵到海外大學教席，本港又缺乏高科技企業，兩頭唔到岸，惟有放棄。港府每年使幾十萬培養出嚟嘅人才，到頭來大部分北上內地做教書匠，直頭係貼埋錢為他人作嫁衣裳。叮！

攞納稅人血汗錢做「蝕本生意」仲係其次，至弊就係，本地根本冇留住人才嘅土壤同條件，發展教育同高科技變成空話。學丘成桐話齋，香港咁搞落去遲早會被邊緣化，連內地城市都不如。

咁講唔係靠嚇o架，中國社科院啱啱發表城市競爭力報告，香港雖然勉強保住「一哥」位置，但經濟規模同高科技產業已經畀上海同北京趕上，競爭力優勢不斷收窄，唔使幾耐就會畀人爬頭。

叮！當今世界，人才第一。睇吓內地主要城市，高科技人才不斷湧入，高科技公司成行成市，高科技產品層出不窮。香港連發展高科技嘅長遠計劃都冇，港府求其劃幅地起幾幢樓，再掛個「科學園」嘅招牌，就算搞高科技。

你估即食麵，當堂醫到肚咩！高科技發展最需要嘅係人才，家陣連自己培養嘅人都留唔住，吸引外來人才更加係天方夜譚。香港科技大學前校長朱經武早就批評過政府唔重視培養人才。以新加坡為例，無論面積定人口都少過香港，但科技研究生就多出三、四倍。邊個競爭力強啲，唔使問都知答案啦。

仲有更肉酸o架！數字顯示，全球一百八十二個經濟體入面，教育喺本地生產總值GDP所佔比例，本港排第一百二十八，居然仲低過印尼，咁嘅名次同包尾有乜分別？

教育投入已經奀過鬼，培養嘅人才走完一個又一個，眼白白益咗人哋。計太一叮話齋，曾蔭權吹嗰「六大產業」，優勢就冇嘞，憂愈縮愈細就真。叮！