小白觀點：長期糧尾激死匪徒

櫃員機黨再度出招，喺尖東獅子銀行一部櫃員機裝咗小型讀卡器，攞晒客戶密碼資料，之後就可以任撳唔嬲。

唔怕同大家講吖，其實我都好怕用櫃員機提款，不過大家千祈唔好誤會，以為我會怕有人偷咗卡資料去偷錢，無錯，提款卡黨對一般人或者會構成威脅，但對於本欄呢啲咁眉精眼企嘅人，真係怕佢哋有牙呀。事關小弟長期糧尾，戶口頂多得一百元，咁啱早兩日仲捐埋去賑災添，櫃員機黨套咗資料一睇，即刻可以評為「垃圾級別」，激到爆肺都有之呀。

咁到底又怕啲乜呢，咪就係怕啲按鍵唔乾淨囉，試過有一次撳完密碼之後，手指唔知點解多幾粒鼻屎，仲有呀，唔知係咪條命生得唔好，次次撳機，前面一定有個師奶，入完一張卡又一張卡，撳足大半個鐘，直情好似機舖打機咁，只係未將成疊卡攞出嚟咋！

Email：sunsiupak@gmail.com

Blog：http://sunsiupak.blogspot.com

阿豪觀點：用月餅罐儲錢好過

早前有櫃員機多收客戶「國際交易費」後，家陣又話有櫃員機黨，直頭偷取埋客戶嘅提款卡密碼，銀行又唔保障客戶，金管局又闊佬懶理，睇嚟市民都係轉番最傳統嘅方法，去銀行打簿，又或者用番月餅罐實際啲咯……

呢單櫃員機密碼失洩案，愈諗就覺得銀行責任愈大。第一，正如網友所講，只要銀行喺櫃員機撳密碼部分加裝保護罩，咁不法之徒咪冇可能睇到偷客戶嘅密碼囉……第二，乜櫃員機唔係有閉路電視全天候監察嘅咩？櫃員機黨又要裝讀卡器，又要裝針孔攝錄機，斷估都要搞一大輪啦，照計應該好容易捉人㗎！

最激氣嘅仲係，其實好多長者唔係好識用自動櫃員機，但係銀行就係咁cut分行，搞到佢哋冇晒選擇，逼住要用自動櫃員機，但係你又確保唔到安全，咁你玩晒啦！

Email：lukchiho75@hotmail.com

Blog：http://lukchiho.blogspot.com

網友觀點……

周仔：銀行啲科技人才遠唔及賊匪，話咁易又得手！

獅子：匪徒讀到卡嘅資料，冇密碼亦冇用，大家按密碼時，用手遮掩就可以。

四眼狗：銀行話會賠償客戶損失，唔知信心又可唔可以賠得番呢？

小客戶：認真後知後覺，出咗事銀行先話檢討同檢查所有櫃員機。