話說三十五年前，傻強中學畢業後攞到獎學金赴美攻讀經濟學，當年入讀嘅美國衞斯廉大學（Wesleyan University）奉行博雅教育，除主修科外，學生仲可以按自己嘅興趣讀唔同嘅選修科。佢入學時簡直好似劉姥姥遊大觀園咁，見到乜都覺得有興趣，都想讀一讀，結果佢入大學第一年讀過社會學同政治，讀讀吓又想多了解美國，於是又去讀美國外交史兼讀哲學、美術史等，搞到冇乜時間花喺主修科經濟學上。但正因為唔同嘅學科令佢大開眼界，反而對修讀經濟學有幫助，令佢覺呢科唔係得數字、理論同圖表，而係着重邏輯分析、思考方法。講完一大輪，其實佢只係想鼓勵年輕人多嘗試，多學習，發掘自己嘅興趣同潛能。