喺早前嘅復活節假期，恒生銀行女大班梁高美懿同家人拉大隊去意大利同瑞士自駕遊，開心嘅「餘韻」直到尋日仲未完全消散。恒生尋日捐出六百萬元推廣本地乒乓球發展，梁太主持送贈支票儀式，之後講起早前歐洲之旅依然雀躍，仲話去外地旅行除咗吃喝玩樂外，最好係冇人識佢喎！
咁又係嘅，梁高美懿喺香港銀行界打滾咁多年，建立一定知名度，平時放假出外消遣，好容易有人認得佢，招呼都要打多幾個，所以離港出外旅遊自然就覺得回復自由身，享受完全屬於自己嘅空間，可以盡情享樂嘞！
呢次歐洲之旅，除咗歎盡心愛嘅意大利美食外，梁高美懿仲買咗唔少靚鞋同靚衫添，佢仲自爆揸咗好多嘢返嚟，莫非佢揸咗架歐洲車返香港？佢笑住話：「手袋咪用手揸囉！」