職工盟就利用聚餐箍住遊行人數，先喺當日上晝搞個「團結聚餐」，喺長沙灣一間屋邨酒樓筵開數十席，有燒味拼盤、粟米羹、粟米斑塊、貴妃雞、魚香茄子煲等，雖然菜式唔算名貴，但每位盛惠四十大元，食飽飽之後就齊齊坐旅遊巴去維園參加大遊行。

簡直係賣大包喎！職工盟統籌幹事蒙兆達就話年年都有搞聚餐，收費只係成本價，工會只係出咗包旅遊車嘅車費，又話每年大約都有四百人參加，大部分人食完呢餐都一齊去遊行。雖然呢招幾有效，但當中有幾多係打工仔真係見仁見智。

而喺遊行前，職工盟立法會議員李卓人仲搞搞新意思，喺網上搵咗個有兩個打橫嘅、類似某間連鎖快餐店嘅商標，上面仲寫住「打工勿當奴」，寓意最低工資水平要達到三十三蚊嘅水平先夠生活。

得到設計者嘅同意後，佢拎咗個標誌印T恤，諗住聽日遊行時賣畀途人，幫職工盟賺吓經費。

鬍鬚曾怕咗請願T恤

佢尋日喺勞福局搞嘅勞動節酒會都送咗件畀署理特首鬍鬚曾，但鬍鬚曾第一個反應係問佢件請願T恤有冇侵權，驚死到咁，睇怕佢都唔會敢着。

至於工聯會，今年就用短片作招徠，佢哋將以往遊行啲片剪接成「約定你，遮打見」，呼籲打工仔五一站出來爭取權益，條片仲放喺YouTube。其實佢哋最少一年前已成立一隊人專門拍片同影相，可以將工聯會啲記者會即時放上網，今次用短片宣傳呢招明顯係吸引「80後」參加遊行。

勞聯就一如既往，先喺佢哋地頭深水埗集合，行去彌敦道再上車過海去維園，佢哋對上一個禮拜日先遊行完，仲有成四百人參加咁多，加上佢哋勞動節遊行係朝早九點，十點就係工聯會，所以預期參加嘅人數都唔會好多喇。