香港地一試定生死，莘莘學子寒窗苦讀，都係為咗會考，補習社未卜先知貼中題，有人歡喜有人憤怒，歡喜嘅係少數，憤怒嘅係大多數，唔少學生質疑考評局試題外洩，對冇補習嘅學生唔公平。

叮，又難怪學生質疑嘅，事關補習社貼中公開試題目已經唔係第一次，而係幾乎年年都中，唔通世上真係有咁多巧合？就以今次嚟講，起碼有兩大疑點：一、補習社嘅模擬試題早喺舊年年底已經提出，距離考試四個幾月，點解考評局唔改題目呢？二、洩題醜聞年年爆，到底考評局有冇認真追查，同埋有冇加強保密措施呢？

面對學生質疑，考評局依然死撐，話有關試題係常設嘅考核點，又呼籲任何人如果可以提供試題外洩嘅實質資料，應該立即向當局舉報喎。叮，考評局居然掉番轉頭，將調查嘅責任卸畀學生，你話係咪混帳吖？

其實，莫講話洩題，就算係考試安排，考評局都搞到一塌糊塗。就講啱啱完成嘅聆聽考試，又係烏龍百出，新引入嘅紅外線播音系統忽然死機、電台廣播接收唔清、有學校甚至喺考試時開咪廣播，無奇不有。另外，有學生投訴，今年會考內容同模式太刁鑽，仲難過高考，質疑考評局特登質低末代會考生嘅成績，用嚟襯托新制度嘅成功。唉，考評局簡直已經變成「劣評局」——「劣評如潮考試局」。

為咗表示不滿，尋日有唔少考生着黑衫應試，發出無聲抗議，佢哋仲準備喺五月一號發動遊行添。可惜啊，學生有學生不滿，劣評局一於懶理，年年會考，年年蝦碌，咁多年來毫無改善，簡直係誤人子弟。連申訴署都睇唔過眼，曾批評考評局粗心大意，得過且過，不思進取，但批評又點吖，考評局話喎，「犯錯係人之常情」，吹咩。

叮！既然犯錯係人之常情，而且仲係一錯再錯、屢錯不改，咁就唔使考試喇，連考評局都可以摺埋添！