本港有好多高格調私人會所，位於中環萬邦行嘅「馬車會所」就係名人蒲點之一，會員制運作保障極高私隱度。保良局副主席鄭錦鐘（Eric）係馬車會所嘅常客，最近保良局換莊，佢早幾日就約埋新任主席呂鈞堯（Quincy）同總理黃英鵬（Simy），以及做深水埗區議員嘅囝囝鄭泳舜一齊去馬車會所開餐，傾吓保良局未來嘅工作，兼分享美食。
馬車會所嘅美食當中，Eric最愛係秘製冰鎮富貴（瀨尿）蝦、蜜汁叉燒同鳳梨包。冰鎮富貴（瀨尿）蝦稱得上秘製，自然製作需時，冇得即叫即做，Eric每次去食飯前都要預訂。瀨尿蝦要整得好食，首先要揀選靚蝦，照一照蝦嘅背部，透過蝦殼可見到有冇蝦膏，愈多蝦膏就愈好。煮法係先將蝦放入熱水烚幾分鐘，然後放入冰水雪藏，約一個鐘後就可除殼切件上碟，呢個製法令瀨尿蝦食落鮮甜，肉質爽口彈牙。
至於會所嘅半肥瘦叉燒亦享譽盛名，政經界中人都讚不絕口，據聞佢哋用嘅都係俗稱「柳梅」嘅靚豬肉，再用獨門秘方炮製；正因為叉燒太多人識整，所以秘方不能外洩。