環境局禮拜三就會將停車熄匙條例草案提上立法會首讀，照計負責推呢啲政策嘅官員都要四出解畫，不過，今日舉行嘅「城市論壇」討論停車熄匙問題，局長邱騰華就寧願去植樹，副局長潘潔又唔知忙乜嘢，搞到要由環保署副署長陳嘉信上陣。問責官員唔身先士卒擋子彈，唔通又係「上樑不正下樑歪」之過？
今日有份出席「城市論壇」討論嘅有立法會航運交通界代表劉健儀（Miriam），以及運輸業界同環保組織代表，仲邀請埋邱騰華添，但節目工作人員話，局方前日黃昏回覆佢哋上禮拜四嘅邀請，話只會派陳嘉信出席，原因就冇交代。
環境局發言人接受查詢時先話，邱騰華一早應承咗離島區議會，今朝九點要去大嶼山昂坪主持植樹活動開幕禮，要十二點半至完成，趕唔切去「城市論壇」；咁潘潔呢？發言人都畀唔到答案，仲話陳嘉信先係停車熄匙呢項政策嘅負責官員，由佢代替正副局長出席比較恰當喎。呢個例子又話畀人聽，問責制都係嘥氣嘅。Miriam知道邱騰華咁卸責後都好㷫，大爆上禮拜四晚收到港台通知時，佢哋仲話邱騰華應承會到，家吓局長、副局長都失蹤，真係及唔上上個禮拜親身上陣嘅政制及內地事務局局長林瑞麟囉。