紅館今日有場重量級表演，就係女童軍舉行嘅禁毒大匯演嘞，多個女童軍要角會粉墨登場，佢哋尋日照足傳統到紅館切燒豬祈求演出順利，連金管局總裁「攞命陳」太太陳唐芷青都有出席，陳太自嘲係大合唱嘅「南郭先生」，即係濫竽充數咁解。
佢話濫竽充數呢個成語故事入面，主角南郭先生就係扮嘢彈奏，而自己平時冇乜點練唱，只係睇老公表演得多，學吓嘢。講到老公，陳太話希望大家以後唔好叫佢老公做「攞命陳」，最好叫「浪漫陳」喎！但點浪漫呢？當然係唔講得啦！
講番個大匯演，女童軍總會總監邊陳之娟、籌委會主席戴胡美蓉、蔡志明太太蔡李惠莉、邱達昌太太邱吳惠平、「眾人媽打」李麗娟等都會表演，其中戴太要Solo，並將鄧麗君嘅《小城故事》改為《香港故事》。