第三屆立法會加入咗幾個政壇新丁，建仔嘅李慧琼喺雷曼、舊樓維修等幾瓣都做出成績，但選後曾經因為英文發音唔正、轟動一時嘅「克勤仔」陳克勤就到家吓都未有乜代表作。近期克勤仔好似搵到新路向，就係做立會嘅動物大使。佢年初簽署咗戒食藍鰭吞拿魚嘅聲明，並就連串虐殺動物個案去信警方高層要求正視，最近又喺網上發起動物警察活動，動作多多。
克勤仔話，虐殺動物案件有增無減，最令人髮指係深水埗有人「丁蟹」上身，將一家五口大小花貓由高處掟落街慘死，情況已刻不容緩，但警方竟然話冇時間理會呢類案件，所以逼住要向黎棟國投訴。克勤仔仲好肉緊，上個禮拜喺社交網站facebook發起成立動物警察，呼籲網民舉報虐殺動物黑點，逼警方做嘢，直到尋晚為止，響應群組嘅網友已逼近一萬一千人。
事實上，克勤仔真係好關心動物㗎，連立法會大樓二樓平台嘅一個「高髻冠」雀巢都多次視察，仲話個雀巢有兩隻雀，一隻負責築巢，另一隻就「睇水」喎！真定假o架？