畢業生相繼走出社會，香港青聯今年亦第二度搞「新鮮人『工』略」，尋日喺柴灣廣場舉行招聘活動，今年接手搞嘅係副主席朱鼎健（Ken），佢因應公司觀瀾湖業務發展，提供三十個空缺，其中私人助理有成兩萬蚊人工，係全場第二高。
其他多個青聯成員都喺集團搵位。信和置業執行董事黃永光提供二十七個職位，合和實業董事胡文新亦提供十七個由八千到過萬蚊人工嘅職位，華人置業董事劉鳴煒就有二十個九千五百蚊嘅職位提供，賭王家族嘅何超蕸都有十七份八千到萬五蚊人工嘅信德好工。
鄭志剛嘅新世界集團今年唔再即場面試，但提供二十幾份八千到萬五蚊嘅工畀年輕人。喺家族遠東發展旗下打理酒店嘅邱詠麒都提供咗十五份由七千蚊起到過萬蚊嘅工，詠麒當年打過銀行工，知道求職過程艱難，所以佢絕對唔會出刁鑽題目考班求職者。