涉恐嚇工會成員惹官非

馮永業○六年入主生促局後，引入新評核制度同花紅制，之後仲捲入涉恐嚇工會成員嘅「豉椒炒魷」官司，最後雖然打得甩單官司，但佢同工會嘅關係已跌入冰點。

陳鎮仁上禮拜四首次喺馮永業陪同下同工會開會，工會理事向陳大數馮永業嘅不是，陳冇幫口，席間仲大講自己做生意嘅理念，話就算將大部分生產線搬咗上大陸，都唔會執香港間廠，搞公營機構同做生意一樣，以人為本，即唔可以乜都為賺錢，仲話以後會同工會多合作。

據引述，馮永業席上相當冇癮，即刻黑面兼左擰右望，表現到好不屑，但工會代表就好過癮，仲一消心頭之恨添。就喺當晚，工會啲人收到消息話馮永業已辭職，大家驚訝之餘，諗番會面嘅情景，都覺得陳鎮仁同馮永業管治理念好唔同，甚至係背道而馳添。

強硬作風唔受主席認同

其實早喺陳鎮仁出席立法會帳委會聆訊時，就已同馮永業有啲唔啱牙，當日馮幫佢預備咗份講稿，但陳鎮仁嫌措施作風太強硬，自己改晒啲字眼，仲主動喺議會認衰道歉，又將手改嘅講稿畀晒所有立法會議員，好似推翻馮永業嘅強硬政策咁。

今次陳鎮仁又搵馮永業出嚟做大龍鳳，都係想安撫嗰班被激到㷫合合嘅工會代表，希望第日可以上下團結一心，搞番好生促局，只係馮永業臨別在即都好冇癮啫。