小白觀點：港女乘機抽水狂插

應屆會考生Ruby自拍短片放上網教英文，論盡香港試場考官嘅發音，點知畀網民圍插，搞到好似十惡不赦咁，真係可憐。畢竟佢年紀仲係細，唔知道世途險惡，莫講話做老師唔使要high english level，做立法會議員嘅英文都唔好得去邊啦，以後唔好咁天真喇。

其實我又覺得Ruby妹妹嘅英文唔算太差喎，至少佢夠膽講，青春無敵兼夾表情多多，尚叫賞心悅目。不過我發覺，插得佢最勁嘅反而係港女，空群而出上載短片回應，更加不忍卒睹。有個豬扒化晒濃妝，講嘢陰聲細氣，睇完都唔知佢講乜，網民只係注意到佢心口有條好深嘅事業線。另外有個港女有啲自知之明，拍到黑媽媽樣都見唔到，睇到心驚驚，仲恐怖過《死亡習作》。嗱，Ruby妹妹，先將額前嗰啲陰剪短，繼續着多幾款tube top上鏡，小白叔叔支持你！

e-mail：sunsiupak@gmail.com

Blog：http://sunsiupak.blogspot.com

阿豪觀點：曲線鼓勵大家進修

Ruby姐近排喺網上教英文嘅短片Hit爆，喺佢眼中，其他考生嘅程度低到好似primary student咁不在話下，就算係監考老師嘅英語發音，佢老姐都係不敢恭維，明明係answer sheet，點知竟然講咗answer sh*t……真係……「好搞笑囉！」

老實講，雖然個口靚妹嘅態度的確係寸到爆，但係我哋千祈唔好因人廢言，問心講句，佢嘅英文都算係咁啦，好過時下唔少大人喎。尤其係成年人，更加應該抱住「有則改之，無則加勉」嘅平常心，無謂同啲細路女計較啦！至於畀佢鬧爆嘅其他疑似primary students，更加應該發奮圖強，正所謂君子報仇十年未晚，你哋應該秘密苦練英文，等到有朝一日流利過外國人時，咪可以自製短片，反擊番Ruby姐，話佢嘅英文好似kindergarten student咁囉！

e-mail：lukchiho75@hotmail.com

Blog：http://lukchiho.blogspot.com

網友觀點……

周　　仔：呢位學生話唔定係陳巧文嘅接班人！

甘　　伯：就算英文點叻，唔識得尊重人一樣扣晒分！

學生王子：睇咗Ruby同學嘅批評，發音唔正嘅老師們要檢討吓喇。

rube：年輕人鍾意自我表現，阿Ruby就揀咗教英文。

有料爆：

世博真係失禮，抄完一樣又一樣，唔搞好過。

SMS傾埋一份：6016 2496