叮，邊個唔知阿媽係女人吖，如果醫療融資唔複雜，就唔使噏完又噏啦。其實，當局嘅所謂醫療融資，根本係打市民荷包主意，無論周一嶽點樣落嘴頭，都注定失敗。話時話，家陣公共醫療系統七國咁亂，周一嶽與其煲埋呢啲無米粥，不如做好自己份工，將醫管局執番正好過喇。

嗱，話口未完，又出事嘞，大埔那打素醫院爆出自製毒氣事件，搞到病人幾乎窒息咁滯。事緣醫院最近裝修，油漆同天拿水氣味透過中央冷氣系統傳遍成間醫院，連手術室都被攻陷。呢啲「毒氣」對病人可大可小，唔係講笑o架。

醫院變成毒氣室已夠騎呢啦，更離譜嘅係，院方居然當冇事發生咁。有醫護人員踢爆，裝修工程已經進行咗個幾月，有人向管理層投訴，話啲怪味會影響手術室同埋部分病房，不過院方根本唔理。

咁就死得人多嘞，手術室每日都做近百個大小手術，被毒氣攻陷，你話影響大唔大吖。

正如專家話齋，如果天拿水嘅濃度超出可容忍水平，會刺激人體黏膜、上呼吸道系統，仲會令人流眼淚、皮膚紅腫，如果過量吸入會壓抑中樞神經同呼吸系統，嚴重嘅仲會致命添。院方關人個關，簡直係草菅人命。

其實，公立醫院中央冷氣系統出事，已經唔係第一次啦。瑪麗醫院○八年底懷疑因冷氣系統過時，停供冷氣，病人焗咗成個月桑拿。舊年夏天，屯門醫院康復大樓嘅中央冷氣系統忽然失靈，大批病人乾蒸咗五粒鐘，莫講話病人，就算冇病都焗出病啦。

唉，香港人真係命苦，連住院都要搵條命嚟博。公立醫院發生醫療事故好似食生菜，開錯刀、輸錯血、割錯器官，又或者開刀後無啦啦留番張刀片喺肚內，呢啲已經唔係新聞，最奇怪嘅係滾水淥B，真係聞所未聞。唔怪得有人話，入咗公立醫院，有命出番嚟都要燒香還神。

叮，公立醫院亂七八糟，烏煙瘴氣，周一嶽仲喺度不務正業，搞乜嘢醫療融資，真係本末倒置，不知所謂！