喺facebook見到有個「要求盡快成立動物警察」群組，咁有意義嘅事，當然即刻加入啦。噫咦，睇睇吓，原來creator係嗰位搓My Breast英語專家，真係失敬失敬喎。只不過，老友A、死黨B呢兩個「80後」行過見到不吐不快，留言問我因乜事同時又加入「香港年輕人之恥」群組，以關懷口脗想知道小弟係咪有精神分裂。

我覺得兩樣嘢又唔可以混為一談嘅，今次克勤仔好醒目，唔再婆婆媽媽咁去爭取綠燈延長一秒，反而目標明確，揀啱一個有普世價值嘅議題，截至寫稿呢一刻，已經有超過六千個成員，真係唔簡單。

咁當然啦，呢個議題跨黨派跨種族，唔會引起人民內部矛盾，亦唔會失驚無神有人大鬧「成立動物警察運動」不利香港政治體制喺《基本法》框架內循序漸進向前發展。話時話，小白老弟認為克勤仔至係真正嘅政治家。

e-mail：sunsiupak@gmail.com

Blog：http://sunsiupak.blogspot.com

阿豪觀點：漁護署係終極「兇手」

facebook發現有一個叫做「要求盡快成立動物警察」嘅群組，起初以為邊種動物咁威，可以幫手維護法紀啦，睇真啲，原來係呼籲成立一個網上平台，收集全香港虐殺動物黑點，以及案件詳情，等警方了解成立動物警察嘅迫切性。

呢個建議幾好吖，群策群力，起碼對嗰啲變態之徒應該有少少阻嚇作用！

講開動物警察，其實唔使大費周章四圍搵，最大嘅「兇手」唔係別人，正正係應該保育動物嘅漁護署。呢嗱，近排接連有野豬喺鬧市出沒，漁護署接報到場協助，點知搞咗大半日都捉唔掂，隻野豬仲死埋添！

其實早幾日審計報告先話，漁護署單係用喺捉流浪貓狗嘅錢，已經要成三千萬！嘩，捉番去，好多時都係殺殺殺殺殺，花咁多錢到頭嚟都係攞動物命，使乜花納稅人咁多錢呢？虐待動物啲人都可以勝任啦！

e-mail：lukchiho75@hotmail.com

Blog：http://lukchiho.blogspot.com

網友觀點……

賓　仔：立法會議員開口埋口講政改，寧願聽陳議員講貓狗好過，唔使悶。

排骨仔：市民做動物糾察最實際，見有人虐待動物即舉報。

貓　王：依家做議員真係唔易做，連貓狗事務都要勞心勞力！

戇　狗：警方都未必保護到市民，仲叫佢哋保護埋啲動物？

有料爆：

港女Ruby上載短片去YouTube晒英文，大家上咗去學嘢未？

SMS傾埋一份：6016 2496