24/04/2010

播放本新聞相關短片

政情:金刀梁阿爺係跌打名醫

醫學傳家係安老事務委員會主席梁智鴻家族嘅傳統,佢係泌尿科專家,爸爸梁金齡當年都係出名嘅西醫,細佬梁智仁依家係香港公開大學校長,但一樣係港大醫學院骨科畢業。一家人從醫,原因係阿爺梁財信早年從醫,係香港知名嘅跌打醫師,今時今日,金刀梁講起阿爺仲記憶猶新。

每餐例夾第一箸餸

金刀梁尋日上電台,由政改講到敬老,講起阿爺梁財信,佢話當年阿爺喺屋企係好重要嘅人,一返到屋企,就有人拎對拖鞋畀佢着;食飯嘅時候,阿爺如果唔夾第一箸餸,佢哋個個都唔敢郁手。

金刀梁話,尊敬老人家係由細訓練到大,不過呢啲都係好多年前嘅事囉,今日咁做就太封建喇。金刀梁仲話:「我覺得老人家要轉吓,後生仔都要轉吓,同啲後生一輩相處,唔應該恃住自己係長者,話咁就要咁,應該同後生仔多啲溝通!」