現代人愈嚟愈唔重視節氣，好多人都未必講得出二十四節氣嘅名，所以，識得睇節氣做人嘅人真係愈嚟愈少。前民政事務局局長何志平近日埋首寫書，佢日前透露機密，話自己寫緊本有關二十四節氣嘅書，希望趕及喺暑假舉行嘅書展面世，似乎好醉心筆耕嘅生活。
肥平近年瞓身搞國民教育，先後出書介紹香港民間信仰、文化同香港掌故等，呢趟再度添食，並研究埋節氣呢啲中國古老曆法之道。佢話，認識時令交替，對養生之道極有幫助，正所謂「因時而宜，因時而變」，即係人應該隨住自然規律改變，調整作息生活。譬如「穀雨」呢個節氣，喺四月二十號已嚟到，呢幾日香港係咪多咗雨水呢？又係喎，真係唔到你唔信。
其實，中國以農立國，睇節氣做人係古人必備嘅生存之道，現代人唔使耕田，又依賴天文同氣象預報系統，結果係識得睇節氣嘅人愈嚟愈少。退出官場後，肥平似乎全心投入傳統文化方面嘅工作，唔通佢有心復古？