歐洲航空交通因為火山灰大癱瘓，打亂好多人嘅計劃，會計界立法會議員陳茂波（Paul）嘅囝囝James都受到牽連，趕唔切返英國牛津大學開學，不過James並唔係喺香港受阻，而係喺土耳其返唔到英國，最終要左轉右轉。
阿Paul話，喺復活節假期之前，James本來諗住返香港陪屋企人，但阿Paul就叫佢應該趁後生出去見識多啲，提議James去吓旅行。於是James就同幾個同學一齊去土耳其伊斯坦堡玩，點知回程前遇着漫天火山灰，等極都未能夠撥開雲霧，最後要搭火車再轉船返英國。
James佢哋首先坐火車去羅馬尼亞，之後轉車去匈牙利布達佩斯，再西行至維也納，然後經阿姆斯特丹再坐船返英國。上禮拜一，James已經喺土耳其上車，但阿Paul到家吓都未收到個仔返到英國嘅消息，仲唔知囝囝目前位置，好彩有email同facebook聯繫，知道佢平安。