香港依山靠海，有私家遊艇可以為生活帶嚟好多姿采。旅遊發展局主席田北俊幾乎每個禮拜都會三代同堂遠離煩囂出海玩，有見田家乖孫愈嚟愈多，呢個時髦阿爺喺舊年年初以「海嘯價」九千萬元，訂製咗一艘007占士邦「御用」嘅Sunseeker超級遊艇返嚟，方便全家出遊。
田少尋日罕有咁借出價值三千萬元嘅意大利Riva豪華遊艇，接載傳媒入長洲視察太平清醮同搶包山活動嘅籌備情況，仲落手落腳示範整平安包添。佢艘遊艇取名「Manhattan Express」，用嘅係佢旗下萬泰集團嘅名。田少話，艘遊艇十年前購入，係佢第五艘遊艇，船身長八十呎，共有三間房。不過，田少榮升爺爺兼外公後，三個乖孫同行，一家九口同玩具搞到遊艇可用面積即時縮水。
所以佢舊年拍板訂製咗一艘英國品牌Sunseeker Predator 115超級豪華遊艇，遊艇全長一百一十五呎，四十二呎闊，仲有五間房添，原定今年年底交貨，不過依家話要延遲半年至運抵香港。
講番尋日嘅活動，田少親手跟師傅做平安包，唔好睇佢平時大少一名，做起包上嚟都有板有眼，連佢都話：「難唔倒我！」