廿四孝老竇鑽研秘技

任Sir話，早年去過英國做「交換生」，即借調到當地做警官，帶住老婆同三個細路，唔單止人生路不熟，又思鄉情切，想搵間酒樓食吓中菜都冇，但班細路話想食點心，廿四孝嘅任Sir惟有學做蝦餃燒賣，整吓整吓，就畀佢鑽研到整點心嘅秘技。任Sir話，整蝦餃最緊要皮薄，啲皮一定要新鮮做，摺口亦好考功夫，唔係就會好易散。佢整嘅美食，連李明逵食過都讚好，睇嚟兩位警隊前高層可以嚟一場廚藝大比併，一中一西，一定好多人想試。

佢家吓放緊退休前休假，每日只係做啲私人事務，暫時未有特別大計，閒時就返去警隊探吓班老友，睇佢真係好逍遙。