24/04/2010

播放本新聞相關短片

政情:燊哥捐五百萬玉樹賑災

青海玉樹大地震災情嚴重,向來為善最樂嘅全國政協常委何鴻燊博士立即捐出五百萬元賑災,捐款由澳門中聯辦代為轉交到青海玉樹縣,以表達對當地災民嘅支持。燊哥尋日仲向玉樹縣災區嘅同胞致以最深切嘅慰問,並衷心祝願受災同胞早日重建家園。燊哥話,睇到救援人員爭分奪秒咁搶救地震生還者,同埋災區人民永不言棄嘅精神,實在令人動容。

同根同生守望相助

燊哥又話,港澳同胞與內地人民同根共生,大家面對天災都會感到非常痛心,但佢相信,只要集結力量同關懷,發揚「一方有難,八方支援」嘅守望相助精神,必能協助災民渡過難關,所以捐出五百萬元賑災之餘,亦呼籲社會各界人士積極參與籌款賑災,為災民提供適時嘅援助。燊哥確係慈悲為懷,善心滿瀉。