截至尋日為止，建制派有建仔六名議員舉手，工聯會就全體四名議員參加，經濟動力四名議員中，都有三個報咗名，唯獨漏咗身兼行會成員嘅「新界王」劉皇發。

泛民嗰邊又點呢？公文袋四人除咗一個辭咗職，其餘三個都入晒去，白鴿黨就有四個舉咗手，另加一個游勇散兵，總數八個咁大把！有人揶揄白鴿黨去世博團都仲有五個報名，傾政改就得四個人，對爭取民主嘅誠意麻麻噃。呢個委員會喺禮拜二（二十七號）就會開會選主席同副主席，個主席位睇怕十拿九穩由建制派初步協商嘅建仔主席譚耀宗出任，泛民都唔恨得咁多。

普選聯晒冷氣勢弱

潮流興晒冷，另一個關注政改發展嘅泛民團體普選聯呢個禮拜日都會玩湊人頭遊戲，佢哋過去開會次次都得十幾個核心骨幹成員參加，嚟緊就要同高官見面，召集人馮偉華諗住聽日下晝三點喺明愛九龍社區中心搞個團結大會晒吓陣容，希望搵齊十三個團體嘅成員聚首一堂、造勢兼晒冷，增加普選聯本錢。

最搞笑嘅係，呢個團結大會有個希望配額制，白鴿黨要認頭二百人，民協就一百人，教協、職工盟、街工同社工總工會都要各自認投五十人，務求湊夠五百人出席團結大會，營造氣勢。唔夠人點算？冇講懲罰機制噃。

不過，呢個團結大會只係得短短一粒鐘多啲，初定內容非常弱雞，淨係唱三首勵志歌同睇一條名為《民主進程》嘅短片，就已經用咗四十五分鐘；之後再係咁意搵學者分析吓依家普選聯嘅對話策略，呼籲大家參與五月二號嘅大遊行，同埋大家一齊推吓大氣球造勢就玩完，似嘉年華多過團結大會。難怪有白鴿黨成員想杯葛，話風頭火勢下邊得閒唱歌？