原來，呢個就係政府解決貧窮問題嘅「獨步單方」嘞。立法會尋日進行財政預算案二讀辯論，勞工及福利局局長張建宗面對議員有關貧富懸殊擴大嘅質疑，死撐話問題唔算嚴重，除咗高談闊論「治本之道」，仲自創「貧富懸殊新計法」添。

經濟暢旺，人人有工開梗係正啦，鬼唔知阿媽係女人咩。至弊弱勢社群分享唔到經濟發展成果，政府扶貧淨係得把口，亦唔係一朝一夕嘅事，連治標都未合格，又有乜資格談治本呀？

張建宗大言不慚咁話，扶貧紓困係港府嘅首要工作，跟手又摷出一大揸「利民紓困」嘅婆乸數，話由○八年至今，港府已經動用咗接近一千一百億元嚟刺激經濟、創造就業同改善民生，證明當局「冇迴避」。

唔知係咪愈計愈興奮，連個腦都燒壞埋，佢居然自行解釋乜叫「貧富懸殊」，話以現金收入量度貧窮唔能夠反映住戶實質收益。譬如，每月平均現金收入得二千八百蚊嘅住戶，如果計埋當局喺教育、醫療同住房等公共服務方面嘅「利益轉移」，實際收入可以去到五千六百蚊咁多。

叮！係咁意計一計，收入多咗一倍，你估自己係有求必應嘅「黃大仙」咩！正如有勞工界議員話齋，張建宗分明係玩數字遊戲，令窮人愈聽愈激氣。無論真又好假又好，半真半假都好，香港窮人愈來愈多，係鐵一般嘅事實。

本港在職貧窮問題嚴重，人工畀僱主愈壓愈低。有調查顯示，九七年回歸嗰陣，月入低於四千蚊嘅打工仔只有二十三萬人，到舊年年初已經飆升到超過四十二萬人。全港在職貧窮家庭有十九萬戶、低收入家庭人口超過一百二十三萬，數字都咪話唔得人驚。

嗱，聯合國嘅數字夠說服力嘞啩？佢哋嘅最新文件指出，香港堅尼指數高達四十三點四，貧富懸殊情況喺全球已發展經濟體系入面穩坐「冠軍」，呢啲咪係影響社會和諧嘅「深層次矛盾」囉。唔怪得中大最近有民調發現，近六成半受訪者認為「窮人與有錢人之間嘅矛盾」情況嚴重咗啦。

港府管治無能，貧富懸殊，尤其係在職貧窮愈來愈惡化，社會流動性愈來愈低，打工仔點搏都難出頭，原地踏步算好彩，分分鐘仲可能打倒褪。

近排興執某「大師」口水尾，講「真的假不了，假的真不了」。計太一叮話齋，如果更貼近本港現實，應該係「富的窮不了，窮的富不了」就真。叮！