天文台前台長林超英（黑英）年初撰文向負責規劃嘅部門發炮，質疑「有勢力人士」逼政府同意以綜合發展為名，於極有保育價值嘅塱原濕地建屋，跟住佢嘅個人網誌《草雲居》瀏覽率大增，「好打得」嘅發展局局長林鄭月娥尋日透露，佢搵規劃署問過黑英到底乜嘢係有勢力人士。
林鄭尋日喺立法會回覆議員質詢時話，所謂嘅「有勢力人士」係泛指新界東北發展研究第一階段公眾參與期間，提出「保育塱原同時仲要顧及土地業權人權益」意見嘅人士。簡單啲講，即係要求政府保育塱原時要顧及土地業權人權益，容許土地業權人喺塱原濕地上建屋嘅人。林鄭雖然話政府會以公眾利益為考慮依歸，但係會平衡保育、善用土地資源及發展需要。
咁即係點？畀人喺濕地起樓定係唔畀呢？自言「退休過度活躍期」嘅黑英已經關注件事，林鄭真係要小心拆招至得。