冰島火山灰搞到好多返香港過復活節嘅本港英國留學生滯留，其中就有立法會議員余若薇兩個囡囡同馬會大董周永健嘅仔，周永健嘅乖仔Justin喺倫敦大學攻讀法律，佢復活節返香港度假，到尋晚都未撲到機位。不過，周永健話Justin仲有三星期先考試，希望到時航運已經回復正常，如果唔係，「游水都要游返去」！
至於余若薇嘅兩個女，細女Jacky趕住返去英國參加會考（GCSE），滯留香港期間一直好心急，驚趕唔切返英考試，尋日終於傳嚟好消息，夜晚就可以上機返英國。
不過，同樣喺英國讀中學嘅二家姐Cheryl就冇咁好彩，要排隊先有得飛，佢哋兩個上個月尾一齊返香港過復活節，估唔到個假期無喇喇延長多日。細女雖然可以上機，但余若薇就擔心火山灰未散晒，坐飛機唔知安唔安全。